AZƏRBAYCAN MİLLİ HÖKUMƏTİNİN FƏDAİ
ZABİTİ ƏBÜLHƏSƏN RƏHMANİ
(1910 - 1987)
Əbülhəsən Rəhmani 1910 - cu ildə Təbrizdə anadan olmuşdur.Atası Əli Rəhmani, "Zərqam Homayun" ləqəbi ilə Səttarxan hərəkatının fəal iştirakçılarından biri olmuşdur.
Əbülhəsən Rəhmani orta məktəbi Təbriz şəhərində bitirmişdir. 1927 - ci ildə İran Kommunist Partiyasının üzvü olmuşdur.1928 - ci ildə Moskva Dövlət Universitetinə daxil olmuş və 1931 - ci ildə həmin univesiteti bitirmişdir.
1931 - ci ildə İrana qayıdıb və həbs olunur.Bir neçə aydan sonra azad olur və orduya göndərilir.Əfsərlik ( zabitlik) məktəbini bitirəndən sonra İran ordusunda xidmət edir.
1935 - ci ildən 1937 - ci ilə qədər ali təhsil alıb təhsilini bitirəndən sonra Tehranda xidmət edir.
1945 - ci ildə İran ordusunun sıralarında aktiv inqilabi fəaliyyətinə görə həbs edilir və Kirman şəhərinə sürgün edilir.
Azad olunandan sonra İran ordusunu tərk edərək, Azərbaycan Milli ordusunda fəal iştirak edir.
1945 - 1946 - cı illərdə Azərbaycan Milli Hökumətinin Xalq Qoşunlarının kadr şöbəsinin rəisi vəzifəsində işləyir.
1946 - cı ilin dekabr ayında Azərbaycan Milli Hökumətinin süqutundan sonra Şimali Azərbaycana mühacirət edir.1947 - ci ildən 1951 - ci ilə qədər Ali Partiya məktəbində təhsil almışdır.
1951 - ci ildən 1953 - cü ilə qədər Azərbaycan Radioinformasiya Komitəsinin İran bölməsinin tərcüməçisi (fars və Azərbaycan dilindən) və redaktoru işləyib.
1953 - cü ildən Azərbaycan Elmlər Akademiyası Tarix İnstitutunda işləmişdir.
1959 - cu ildə "Tarix - e Aləm araye - Əbbasi" mövzusunda namizədlik dissertasiyasını müdafiə etmişdir.
1971 - ci ildə isə "Azərbaycan 16 əsrin ortalarından 17 əsrə qədər" mövzusunda doktorluq işini uğurla müdafiə etmişdir.
Rəhmani Əbülhəsən 1946 - cı ildən 1987 - ci ilə qədər Azərbaycan Demokrat Firqəsinin fəal üzvü olmuşdur.Bir neçə il Azərbaycanda yaşayan siyasi mühacirlərin rəhbəri olub. Dəfələrlə elmi - praktik konfranslarda iştirak edib, çoxlu sayda məruzələri və elmi məqalələri dərc olunub.
1992 - ci ildə Əbülhəsən Rəhmaninin yazdığı Azərbaycanın 17 əsrə aid xəritəsi "Tarixi - coğrafiya" kitabında dərc olunub, Azərbaycan Hökumətinin Ali mükafatına təqdim olunmuş - dur.
Əbülhəsən Rəhmani 1987 - ci ildə oktyabr ayının 14 - də vəfat etmiş, Bakıda Yasamal qəbiristanlığında dəfn edilmişdir.
Guləddin İsmayilov
Azərbaycan Jurnalistlər Birliyinin üzvü